Gilatag ni ex-officio Board Member Eddie Ampyawan, “Datu Bawang”, ang iyang 11 point agenda isip representanti sa Indigenous People (IP) sa Agusan del Norte sa hawanan sa Sangguniang Panlalawigan, atol sa unang adlaw sa pagsugud sa iyang katungdanan, kagahapon. Gi-usa usa sa opisyal ang mga mosunod- sayrun ang ihap sa tanang lumad sa probinsya, kinahanglan mabutangan ug representanti gikan sa lumad ang kabarangayan, lungsod ug syudad; ang pagpatitulo sa labing sayun ug dali nga paagi sa mga yutang kabilin, paghatag ug libreng edukasyon sa mga kabataan sa tribu hangtud sa kolehiyo, makabenipisyo sa PHILHEALTH sa goberno nga libre, tabangan ang tribu sa pagtikad sa yutang kabilin, ang pagparehistro sa mga kabataan sa tribu ngadto sa Local Civil Registrar, siguradoon nga walay diskriminasyon sa mga lumad, dili mapanamastamasan ang kultura ug kustombre sa tribu ug ang pagsprotektar sa katungod sa tribu sa iyang yutang kabilin.
Niapilar si Board Member Ampyawan sa mga kaubanang sakop sa Hunta Probinsyal nga tabangan siya alang sa pagkab-ot sa iyang gitinguha alang sa kaayuhan sa mga lumad sa lalawigan. Mapasalamaton usab siya sa kagamhanang probinsyal sa Agusan del Norte ubos ni Gov. Angel Amante- Matba nga nabutangan ug representanti gikan sa lumad sulod sa dugay na nga panahon nga kini gihandum.
Sent from my Samsung Galaxy smartphone.
