Saludo si ex officio Board Member “Datu Bawang” Eddie Ampyawan sa iyang ka-tribung Higaonon human maisogon kining mibiya sa pagsuporta sa rebelding New Peoples’ Army (NPA) tuyu aron makab-ot ang tinoud nga kalinaw kauban ang goberno.
Pamahayag ni Datu Bawang nga dili na mababagan ang kalamboan nga ihatud sa goberno ug maoy matagamtaman sa mga lumad karon kay wala nay hulga sa seguridad.
Nagtoo siya nga hingpit nang mohinay ang walhong kalihukan kung wala naman usab silay suportang masa nga kadaghanan mga tribu.
Giluwatan ni Datu Bawang ang maong mensahe human gipasar ang Tribal Resolution Number 11 series of 2019 pinaagi sa Tribal Council ug membro sa CADT 118 sa tribung Higaonon sa Brgy. Lawan-lawan, Las Nieves, Agusan del Norte nga nagdeklarang Persona Non Grata sa rebelding NPA
Sa kabahin ni Mayor Avelina Rosales sa lungsod sa Las Nieves, malaumon siya nga sinsiro ug dili na mobalik sa rebelding grupo ang mga nagsurender human usab makauban ang pamilya diha sa malinawon nga pamuyu.
Mahinumduman nga niadtong nakalabyang adlaw nahitabo ang pagsurender sa 7 ka mga regular nga membro sa NPA, 14 ka sakop sa Militia ng Bayan (MB) ug 65 ka membro sa Underground Mass Organization (UGMO) didto sa Brgy. Lawan-lawan, Las Nieves, Agusan del Norte.
Lakip sa gisurender ang tulo ka mga high-powered nga armas nga gilangkuban sa 1 ka M16, usa ka Carbibe rifle ug 1 ka Garand rifle.
Sa maong higayon usab gisunog sa tribung Higaonon ang bandila sa rebelding NPA human ang deklarasyon sa Persona Non Grata.
[image: bawang.jpg]
