Personal nga gi-endorso sa Hugpong ng Pagbabago pinaagi ni Davao City Mayor Sarah Duterte ang opisyal nga mga kandidato sa local ug national atol sa Senatorial Caravan sa Gingoog City, Misamis Oriental niadtong adlawng Biyernes.
Mismong si Gov. Yevgeny Emano ang nanguna sa team Padayon Pilipino uban ang mga kauban niini sa partido sa lalawigan kinsa mipadayag sa ilang tagsa-tagsa ka mga plano alang sa kaayuhan sa katawhan.
Sa maong campaign caravan, gibana-banang mokabat sa 5 mil ka delegado ang mitambong ug naminaw sa plataporma sa matag kandidato.
Sa iyang bahin, gibutyag ni Gov. Emano nga dili na angay ikakurat ang pag-endorso kanila ni Mayor Sarah Duterte tungod kay suportado man nila ang Hugpong ng Pagbabago.
Gipasalig usab niini nga taman sa ilang makaya, ilang suportahan ang mga senatorial candidates ilawom sa Hugpong ng Pagbabago.
