Davao City – Kapin 600 ka mga individuals ang namakwit kagabii sa San Rafael Brgy. 9-A syudad sa Davao nunot sa nasinatian nga pagbaha.
Sa ekslusibong interview sa DXDC RMN Davao ngadto kang Brgy. Captain Tata Llubit nga sagad sa lugar nga nag-evacuate ang Purok 9,10 ug Purok 11 sakop sa maong barangay.
Matud ni Llubit nga iya dayon gipahimangnuan ang mga residente nga nagpuyo daplin sa kasapaan aron ug gipaadto gilayon sa evacuation area.
Pasado alas 6:00 sa buntag naghinayhinay na sab ug pamauli ang mga residenti ngadto sa ilang matagsa tagsa nila ka pinuy-anan tungod kay nagsubside ang level sa tubig sa maong sapa.
Sa pikas bahin, ubay-ubay usab ka mga residente nga nagpuyo sa daplin sa sapa sa Purok 8 River View Bacaca Brgy 19-B ang namakwit human nakasinati sa pagbaha kagabii tungod sa kusog nga pag ulan.
Sa gihimong interview kang Jhonny Lee, residente sa maong lugar, miingon kini nga alas 9:00 sa gabie nagsugod na og pamakwit ang mga residente human nahadlok sa pagtaas sa level sa tubig.
Pipila usab kanila ang nakauli na sa ilang panimalay apan ang ilang mga kagamitan nagpabilin gihapon sa evacuation area.
Kahinumdoman ang nahisgutang barangay nakasinati og pagbaha niadtong milabayng tuig 2018 og daghan pamilya ang naapektuhan ug namakwit.
RadyoMan Don Pulayao
