Davao City – Nanawagan karon ang kadumalahan sa Davao City Overland Transport Terminal (DCOTT) sa mga pasahero nga mag sayo og biyahe karong Semana Santa aron dili maapektuhan sa dagsa sa mga pasahero.
Sa pakighinabi sa DXDC RMN Davao kang Aiza Usop, DCOTT manager, gibutyag niini nga sama sa ilang kasinatian sa milabay nga panahon, magtinukloray na ang mga pasahero aron lamang makasakay sa bus pauli sa ilang mga lugar atol sa Holy Week.
“Kung mahimo unta, mag sayo-sayo lang gyud ta because based on experience mudagsa gyud ang atong mga pasahero ug dili paabuton nga magtinukloray na pud ta aron lang makasakay,” segun niini.
Pahinumdom usab ni Usop sa mga biyahero nga dili magdala sa mga ginabawal nga butang sulod sa terminal sa mga mahait nga hinagiban.
Dugang pa sa DCOTT manager, nga kung magdala og hayop, kinahanglang aduna kini klarong paples/credentials o permit to carry aron kalikayan ang pagkadelatar sa biyahe.
Kung aduna usay kargamento, ipakarga lamang kini sa mga porters nga adunay numero ang t-shirt ug nagsul-ob og ID. Samtang mamalit lang usab sa legal peddlers o mga nagapamaligya sa terminal aron kung adunay reklamo, pwede lamang kuhaon ang numero sa ilang t-shirt ug deritsong i-reklamo sa DCOTT admin office.
RadyoMaN Kirby Manzon
