Davao City – Dako sumala pa’g tabang ang pagpailawom sa awtoridad sa mga personahe sa Davao City Overland Transport Terminal (DCOTT) sa usa ka bomb orientation.
Sa pakighinabi sa DXDC RMN Davao kang Aiza Usop, DCOTT manager, gisaysay niini nga gipailawom sa orientation ang mga porters, peddlers, vendors, canvassers ug security guards sa terminal sa pagpanguna sa Task Force Davao Explosive Ordinance Division (EOD).
Segun ni Usop nga pinaagi niini, magbaton og kahibalo ang mga personahe sa DCOTT sa pagbantay ug pag report sa mga tilimad-on sulod o gawas sa terminal.
“Dako kaayo na’g tabang sa atong mga personahe tungod kay sila ang frontline o naa sa gawas sa atong terminal diin makabalo sila unsaon nila pag identify sa maong kadudahang butang ug indibidwal.” segun niini.
Nasayran nga gitudloan ang mga DCOTT personnel sa klase-klaseng mga hitsura ug components sa Improvised Explosive Devices (IED) ug uban pang mga eksplosibo nga sagad ginagamit sa mga terorista.
Nasayran nga preparasyon usab ang maong orientation sa pagdagsa sa mga pasahero sa taliabot nga Semana Santa ingon man sa Palarong Pambansa karong bulana.
RadyoMaN Kirby Manzon
