DCOTT: Suspensyon sa pagpasakay sa bus stops temporaryo lang

Davao City – Nangayo og despensa ang Davao City Overland Transport Terminal (DCOTT) sa temporaryong pagsuspende sa pagpasakay og mga pasahero sa bus stops sa dakbayan sa Davao.

Sa interbyu sa DXDC RMN Davao kang Aiza Usop, DCOTT manager, gisaysay niini nga iyang nasabtan ang sentemento sa ubang mga pasahero ilabina kadtong layo sa terminal diin hasol alang kanila ang palisiya ilabina kadtong adunay daghang dalang mga bagahe.

Gipasabot ni Usop, tumong sa maong direktiba sa City Transport and Traffic Management Office (CTTMO) nga mapahugtan ang seguridad human sa pagpamomba sa usa ka bus sa Koronadal City, South Cotabato.

“Mangayo ko og suporta sa atoang mga pasahero nga kung unsay atoang gipatuman karon nga palisiya or guidelines nato, mu-follow lang sa gyud ‘ta tungod kay (kini) ginahimo nato alang usab sa kaayohan sa katawhan ug sa kadaghanan,” sulti ni Usop.

Sumala sa DCOTT manager, suportado usab sa mga bus operator ang maong direktiba, diin kini temporary lamang samtang naka-red alert pa ang awtoridad.

RadyoMaN Kirby Manzon

<www.avast.com/sig-email?utm_medium=email&utm_source=link&utm_campaign=sig-email&utm_content=webmail>