Davao City – Kapin 200 ka mga personahe ang gidugang sugod karong adlawa human gilugwayan ang Enhanced Community Quarantine sa syudad sa Davao hangtod Mayo 15 aron mobantay sa mga Quarantine Security Control Point (QSCP) human dunay mga lugar nga gipanglockdown sa syudad sa Davao sa kampanya kontra COVID-19.
Sumala ni P/Capt. Rosario Aguilar, Davao City Police Office Spokesperson, mokabat sa 258 ang gidugang nga pwersa nga gilangkuban sa mga membro sa TF Davao, DCPO, Police Auxiliary ug mga Barangay Tanod sa dugang 22 ka mga QSCP.
Matud ni Aguilar, ang maong nadugang maoy mobantay sa 22 ka mga gilockdown nga mga eskinita, household ug mga compound sa dakbayan sa Davao.
Sa pikas bahin, inanay nang naadaptar sa mga Dabawenyos ang mga guidelines una pa gilugwayan ang Enhanced Community Quarantine (ECQ) sa syudad tungod sa pag-ubos sa ihap sa mga violators.
Matud ni Aguilar, sa nakalabay’ng mga adlaw wala nay nadakpang misupak sa liqour ban, miubos usab ang ihap sa mga nakalapas sa FM Pass ug curfew hours, hinoon aduna gihapoy mga malapason apan gamay na lamang.
RadyoMaN Bernard Pantallon
