Davao City – Gipaniguro sa Davao City Police Office (DCPO) ang igong seguridad kung aduna nay pormal nga direktiba sa pag abri sa ubang mga estalisyemento ilawom sa General Community Quarantine (GCQ).
Kini human gi-anunsyo sa Malakanyang nga tugotan na ilawom sa GCQ areas ang mga traditional nga sinehan, driving school, video o interactive game arcade, library, museum, cultural center, exhibition ug conferences.
Sa interbyu sa DXDC RMN Davao kang Police Captain Rosario Aguilar, DCPO Spokesperson, gibutyag niini nga mag agad sila sa direktiba nga City Government of Davao oras nga mag-abri ang maong mga establisyemento, dayon ilahang i-deploy ang security forces nga gikinahanglan.
“Sa PNP, ang amoang primary role is enforcement sa laws, executive orders ug uban pa. So kung unsay ipagula (nga direktiba) sa atong lokal nga panggamhanan, mao ‘to atong ipa-implementar,” matud ni Aguilar.
Sa bahin sa netizens, daghan ang wala mipabor sa maong direktiba diin posibleng magbaton na usab og surge sa Coronavirus Disease 2019 (COVID-19) cases labi na nga wala pa nagsugod ang vaccination program.
Samtang, pabor usab ang mga negosyante sa maong direktiba aron mabalik ang ilang negosyo human sa pagkalugi sa nahisgutan tungod sa krisis hatud sa pandemya.
RadyoMaN Kirby Manzon
