SARANGANI PROVINCE— Ugmang adlawa na, adlaw nga Miyerkules, Hulyo 3, ang deadline sa pagpasa sa aplikasyon aron makaapil sa prestihiyoso nga Sarangani Junior Officials (SJO) 2019 abri ngadto sa tanan nga mga interesadong estudyante sa junior og senior high school sa tibuok Sarangani Province, hilabi na kadtong mga youth leaders and officers.
Segun ni Ms. Gretchin Boni, ang OIC program manager sa Sulong Kabataan ilalum sa buhatan ni Governor Steve Chiongbian Solon, extended hangtud ugmang adlawa ang ilang pagdawat sa application letter, curriculum vitae kon resume og endorsement gikan sa school head o principal.
Mao kini ang programa kung diin ang mga kabataan ang pagapilion nga maoy mahimong little boy and girl officials atol sa Linggo ng Kabataan og International Youth Day karong bulan sa Agosto.
Mahimo silang junior congressman, junior governor, junior vice governor og junior board member. May tsansa usab silang makauban ang mga opisyales sa pag-apil sa mga meeting, pag-obserba sa sesyon, pagbuhat og mga resolusyon, og pag-adto sa mga kabarangayan.
Sa Sarangani Province, ikatulo (3rd) katuig na kini karong gibuhat katambayayong ang opisina ni SK Federation President Board Member Reymar Dian. Dili tiaw ang proseso tungod kay mupailalum usa sa comprehensive exam ang mga aplikante una muabot sa next round nga mao ang panel interview.
Top 10 matag munisipyo sa Sarangani ang unang pagakuhaon hangtud mabilin na lang ang duha (2) kabuok matag lungsod og ang wild card nga gikan sa Top 10. Sila ang mupili sa ilang magustuhan nga maoy manguna sa ilang grupo isip little governor, little congressman og little vice governor, dise-sais (16) kabuok sila tanan apil ang mga little board member.
Pinasahi ang Sarangani Junior Officials tungod kay dili lang sila kutob sa usa ka semana panahon sa Linggo ng Kabataan subay sa naandan kundili sila na ang mulangkob sa dungag youth facilitators and youth volunteers sa Sulong Kabataan program.
Atol sa Linggo ng Kabataan, mupuyo sila sa Kasfala Hall sulod sa Kapitolyo sa Sarangani aron tudluan og hanason pa ang ilang kahibalo og ang ilang leadership skills ilalum sa ginatawag nga Sarangani Youth Leadership Academy. Samtang, ang ilang mga kauban nga wala makuha ang pwedeng makaapil sa mga pa-contest sama sa hip-hop dancing og battle of the band.
Sa obserbasyon sa Sulong Kabataan program, daghan ang ga-partisipar sa Sarangani Junior Officials og sa uban pang youth events tungod na usab matud pa kay nakita sa mga kabatan-unan nga sinsiro si Governor Solon nga alalayan sila, kauban sila Senador Manny og Congressman Ruel Pacquiao, Vice Governor Elmer De Peralta, mga board member og mga mayores.
Karong katapusang semana sa bulan sa Hulyo, gikatakda pud ang deadline sa pagpasa og nominasyon aron makaapil sa ikaduha (2nd) katuig na nga Sinag Kabataang Sarangan Award.
Paga-ilhon sa tibuok Sarangani Province pinaagi sa paghatag og pasidungog ang mga kabataan og organisasyon nga padayong nakatutok sa kalambuan sa mga kabataan.
