Roxas City, Capiz – Padayon nga nagasaka ang numero sang dengue cases sa probinsya sang Capiz base sa monitoring sang Capiz Epidemiological Surveillance and Response Unit(CESRU).
Nahibaloan nga sang Pebrero 23, 2019, nagdangat na sa kabug-osan nga 411 ang numero sang dengue cases sa Capiz kun sa diin nagikan naman sa syudad sang Roxas ang may pinakadamo nga kaso.
Samtang ginpahayag dugang sang Development Management Officer IV sang DOH-Capiz nga si Mr Joeffry Espiritu, isa na ang ginbawian sang kabuhi matapos nga ma-diagnose sang balatian nga dengue. Ini ang isa ka bata nga babaye nga nagapang-edaron sang anum ka tuig halin sa banwa sang Dao.
May kaangut sini, padayon sa gihapon ang panawagan sang Provincial Health Office sa publiko nga ipabilin ang kalipmyo sang palibot kag i-obserbar ang 4S para nga matapna ang makahalalit nga dengue.
