Dengue cases ha Region 8 umubos han tuig 2017 pero 27 an namatay

45

TACLOBAN CITY – 31% an gin-ubos ha kaso nga dengue dida han nakalabay nga tuig 2017 kompara dida han 2016. Dida han 2016 in may suma-total nga 6,327 nga kaso han dengue samtang dida han 2017 in 4, 330 nala an kaso ha bug-os nga Region 8.

Pero sumala han Department Of Health Regional Office 8, bisan paman naghamubo an kaso han dengue ha rehiyon in nagpapabilin nga dako la gihapon an ihap han mga namatay durot han dengue.

Ha bug-os nga Eastern Visayas in may ada suma-total nga 27 nga mga namatay, 7 dinhi ha probinsya han Leyte, 4 ha Southern Leyte, 1 ha Eastern Samar, 5 ha Northern Samar, 3 ha Tacloban, 4 ha Ormoc ngan 5 ha Catbalogan.

Sumala kan Leonido Olobia, Dengue Program Coordinator han Department Of Health, mas gin-papakusog pa han ira buhatan an pagpahinumdom ha mga mulopyo nga diri pasagdan an mga maiha na nga naipon nga mga tubig ilabi na ha kalibungan.

Dugang pa han DOH, pati ha mahagkot nga panahon ngan dirI la ha mauran nga panahon nadamo an kaso han dengue. Pinakadamo daw dinhi an kaso in tinikangan ha bulan han Hunyo ngadto Desyembre.

Facebook Comments