Roxas City, Capiz – Isa ka sinapol ang gin-organisar sang Committee on Education sang Sangguniang Panlalawigan sa pagpanguna ni 1st district Board Member Thea Faith Reyes may kaangtanan sa Dengue Outbreak sa probinsya sang Capiz. Nagtambong sa sinapol sanday Vice Governor James Magbanua, mga katapo sang SP Committee on Education nga sanday BM Weldy Apolinario, Matt Hachuela, Eleuper Martinez kag BM Bugs Baguio, City Councilor Paul Ivan Baticados, Chairman sang Committee on Education sa Sangguniang Panlungsod, DepEd Capiz Schools Division Superintendent Dr. Roel Bermejo, kaupod ang mga district supervisors sa bug-os nga probinsya, kag mga katapo sang Provincial Health Office kag Department of Health. Makaalarma na suno kay BM Reyes ang padayon nga pagsaka sang kaso sang Dengue sa probinsya kun sa diin naglab-ot na sa 2,177 ang biktima, 14 diri ang ginbawian sang kabuhi. Base sa datus sang Capiz Epidemiological Surveillance and Response Unit (CESRU) mas mataas ini sang 757 % kumparar sang nagligad nga tuig. Ginpatawag sini ang sinapol agud hibaluon ang tikang sang DepEd bangud talalupangdon nga pinakamataas nga porsyento sang biktima sang dengue ang mga school-aged children. Guinpahayag ni Reyes nga kinahanglan ang kooperasyon sang komunidad ilabi na sang pamunuan sang tagsa ka eskwelahan nga protektahan ang ikaayong-lawas sang kabataan . Pagatinguhaan sang komitiba sini nga makahatag sang nagakaigo nga bulig ang gobierno probinsyal sa mga inisyatibo sang gobierno lokal kag DepEd agud mapasangkad ang kampanya batuk sa dengue. Guinkilala man ni Reyes ang daku nga papel sang media sa masangkad nga information dissemination sang 4S campaign.
(c)- Roxas City Communication Group
