Roxas City, Capiz – Pormal na nga nadeklarar ang dengue outbreak sa probinsya sang Capiz matapos ang ginpapanaog ni Gov Esteban Evan Contreras nga executive order sang nakaligad nga adlaw sang Biernes.
Ini ang bangud sa padayon nga pagsaka sang dengue cases sa probinsya nga naglab-ot na sa 2,177 ka bilog sa diin 14 ang ginbawian sang kabuhi base sa rekord sang Capiz Epidemiological Surveillance and Response Unit ukon CESRU sang Provincial Health Office.
Ang syudad sang Roxas amo sa gihapon ang may yara sang pinakadamo nga nalista nga kaso nga naglab-ot sa 431 ukon 700-percent nga mas mataas kun ikumparar sang kapareho nga period sang nagligad nga 2018.
Nahibaluan nga sa nasambitan nga executive order nga ginpapanaog sang gobernador, ginamanduan ang tanan nga local government units nga magbalay sang preventive kag control mechanisms agud nga matapna ang dengue.
Kinahanglan man nga magkrear sang mga komitiba kag task forces para mapasangkad ang kampanya kontra dengue.
Ginaganyat man ang mga kabarangayan nga magpatigayon sang simultaneous “Kontra Dengue Day” ukon serye sang mga clean up drives tagsa ka adlaw sang Sabado nga magaumpisa na sa maabot nga Hulyo 13.
