Ginclosed na sang Provincial Health Office sang South Cotabato sa national level ang event based surveillance sini angot sa dengue outbreak sa probinsya matapos nga nagnubo na ang kaso sang nasambit nga balatian.
Samtang suno kay Assistant Provincial Health Officer Alah Baby Vingo sa provincial level kinahanglan pa sang Provincial Disaster Risk Reduction and Management Council nga pungkuan agud nga malift sang Sangguniang Panlalawigan ang deklarasyon sang state of calamity.
Apang ginaawhag niya ang mga pumuluyo nga ipadayon ang search and destroy sa breeding place sang lamok nga nagadala sang balatian nga dengue sa probinsya tungod nagabilin sa gihapon nga mataas ang risgo sa nasambit nga balatian matapos nga base sa dengue vector surveillance madamo sang lugar nga may-yara sang presensya sang lamok sa probinsya nga nagadala sang dengue.
Base sa datos sang Integrated Provincial Health Office sang South Cotabato nagalab-ot sa 26 ang patay sa balatian nga dengue sa probinsya halin Enero subong nga tuig.
