Laing pondo na usab ang pagadawaton sa Provincial Government sa Sarangani gikan sa Department of Energy og sa Southern Philippines Power Corporation kon S.P.P.C human nga gitugutan niadtong Martes, atol sa regular sesyon sa Sangguniang Panlalawigan nga pirmahan ni Governor Steve Chiongbian Solon ang Memorandum of Agreement tali nila Energy Secretary Alfonso Cusi og SPPC Executive Vice President og Chief Executive Officer Mr. Tirso Santillan Jr.
Kung niaging bulan, P2.6 Milyon ka pesos ang gihatag sa Department of Energy og sa Southern Philippines Power Corporation para ipalit og mga himan sa mga municipal hospital sa Sarangani Province og mga kagamitan para sa mga barangay health workers kon BHWs, karong bulana muhatag napud sila og P1.6 Milyon ka pesos aron masugdan na ang pagpatukod og footbridge gikan Barangay Poblacion Proper paingon Sitio Balakayo, sakop sa lungsod sa Malungon.
Segun ni Board Member Hermie Galzote, ang chairman sa komitiba sa legal matters og maoy nagduso sa resolusyon, katugbang sila Board Member Arman Guili sa komitiba sa energy, Board Member Rosemarie “Balot” Martinez-Sayo sa komitiba sa imprastraktura, og mga kaubanang board member og gidumalahan ni Vice Governor Elmer De Peralta, dakog tabang matud pa ang maong pagatukuron nga tulay pabor sa mga kabataang estudyante nga dili na mabalaka mutabok og sapa panahon sa mga pagbaha.
Gisaluduhan ni Board Member Galzote ang pagpaningkamot ni Governor Solon nga makahagdaw og mga pondo og madapat ang maong mga pondo para sa labing nanginahanglan, ubos sa Sulong Sarangani flagship program. (News from: Governor’s Office of Sarangani)
