Sarangani Province- Subling magpahigayon og libreng surgical mission ang Department of Health sa probinsya sa Sarangani ipahigayon sulod sa Doctor Cornelio Martinez Senior Memorial Hospital, ang nag-inusarang pampublikong hospital sa lungsod sa Kiamba.
Usa kini ka dakong surgical caravan tungod kay katugbang sa Kiamba Hospital og Sarangani Provincial Health Office ang dekalibre nga mga doctor og medical team gikan sa Cotabato Regional Medical Center, ang regional health center nga gidumalahan sa Department of Health.
Aduna pay dakong panahon nga magpalista ang mga taga-Sarangani ngadto sa ilang Municipal Health Office og Municipal Social Welfare and Development Office tungod kay gitakda ang operasyon karon pang Oktubre baynte tres (23) paingon Oktubre baynte-syete (27).
Niaging tuig, Sarangani Province gihapon ang napilian sa DOH nga lokasyon sa ilang surgical mission kauban ang medical team sa Amang Rodriguez Memorial Medical Center naka-basi pa sa Marikina, Metro Manila, og karong tuiga ilang ipadala ang Cotabato Regional Medical Center.
Segun ni Doctor Arvin Alejandro, ang provincial health officer, mudawat sila og major operation sama sa bukol sa thyroid, mayoma, danlak og cyst.
Adunay prescreening ang mahitabo unang semana sa bulan sa Oktubre apan dili mabalaka ang mga katawhan tungod kay ang grupo sa Sulong Kalusugan program ang mu-schedule sa pagtuyok sa matag munisipyo aron dili na mamelete muadto pa sa Kiamba Hospital.
October 1 mag-prescreening sa Malungon. October 2 sa Glan kadtong mga kliyente gikan Glan og Malapatan. October 3 sa Alabel. October 4 sa Maasim. Og October 5 sa Maitum. Tungod kay duol ra ang Maitum sa munisipyo sa Palimbang, lalawigan sa Sultan Kudarat, pwedeng magpalista ang mga taga-Palimbang sa Maitum.
Ilalum sa Philippine Health Agenda, gusto gayud ni Pangulong Rodrigo Duterte nga iduhol sa tugkaran sa mga pobreng lumulupyo ang serbisyong medikal. Og kini ang dili na bag-o sa Sarangani pagsugod sa pagdumala ni Governor Steve Chiongbian Solon pinaagi sa iyang Serbisyong Sarangan Community Outreach gidumalahan ni Ms. Asma Akmad.
