Bukidnon – Andam ang Department of Education kon DEPED nga musunod sa Memorandum Circular Number 25 nga gi-isyu ni Pangulong Rodrigo Duterte dili pa lamang dugay.
Ang MC 25 nagmando sa tanang buhatan sa gobyerno apil na ang mga government-owned and controlled corporations (GOCCs), State Universities and Colleges (SUCs) ug tanang public schools sa tibook nasud nga tangtangon ang hulagway sa Pangulong ug hulipan sa mga hulagway sa sa mga nasudnong bayani sa ilang mga buhatan.
Base sa Memorandum Circular, gawas sa iyang hulagway, gipapapas usab ni Pangulong Duterte ang mga hulagway sa mga opisyal sa gobyerno sa tanang mga opisina sa gobyerno ug bayloan kini sa mga hulagway sa mga nasudnong bayani.
Buot ipasabot niini, dili na angayan makita ang mga hulagway sa mga pulitiko ug uban pang opisyal sa gobyerno sa ilang mga opisina.
Sa interview sa RMN Malaybalay ngadto kang City Schools Division Superintendent Dr. Edilberto Oplenaria sa Malaybalay City Division gibutyag niini nga sa pagkakaron ila pang gihulatan ang opisyal nga kopya gikan sa central office, hinoon nangandam na usab sila sa pagpatuman niini kung aduna nay kamanduan.
Matud ni Dr. Oplenaria nga naka-andam usab silang nga sundon ang mao nga kamanduan gani man oras makadawat na sila ug direktiba iyang ipadala gilayon kini ngadto sa mga tulunghaan nga sakop sa Division of Malaybalay.
Sigun niini nga nakalatid sa MC 25, na tumong niining mapakusog pa ang nasyunalismo sa mga Pilipino ug ang pagrespito sa mga bayani aron mahatagan ug bili ang kasaysayan sa atong nasud.
Samtang sa managbulag nga interview sa RMN ngadto kang Sunny Ray Amit, ang chief, schools governance and operation division sa Bukidnon Division, gibutyag niini nga naghulat usab sila sa kamanduan sa rehiyunal o nasyonal nga buhatan alang sa hingpit nga pagpatuman niini.
Matud ni Amit nga sa iyang kaugalingong opinyon supak unta siya niini tungod kay nakapatik na sa kasaysayan sa Pilipinas ang mga napiling pangulo sa nasud, aron usab unta matud pa mahatagan ug kahigayunan ang mga kabataan nga makit-an, ug makapangutana kung kinsa ug unsay nahimo sa mga lideres sa nasud.
Hinoon, gisiguro niya nga sundon ang unsa may direktiba nga ihataga sa ilaha.
