Gi-angkon sa Department of Education kon DEPED – Malaybalay City Division nga adunay mga school principal ang wala nitugot nga adunay magbakuna sa mga tulunghaan.
Una niini, nanawagan ang Provincial Health Office sa ning probinsya sa DEPED nga unta muhatag ug go signal aron makapahigayon sila ug pagpabakuna sa mga estudyante sa mga tulunghaan.
Kini human nga anaa lang sa 4 ka lungsod sa Bukidnon sulod sa 22 ka mga lungsod ug siyudad ang nituguto kanila nga maghimo ug vaccination.
Sa interview sa RMN Malaybalay ngadto kang Assistant Schools Division Superintendent Sunny Ray Amit gibutyag niini nga sakto ang argumento sa pipila ka mga mga school principal nga dili sila mutugot nga adunay himoon nga pagpabakuna sa ilang mga tulunghaan tungod kay wala usay mga consent o pagtugot gikan sa mga ginikanan.
Una nang gipamahayag ni Provincial Health Officer Dr. Ricardo Reyes nga nagtigom na sila ni Board Member Marivic Montesclaros ang chairman sa committee on health sa Sangguniang Panlalawigan ug gihisgutan ang mao nga problema.
Matud ni Dr. Reyes nga iyang gisugyot sa SP nga magpasar ug usa ka resolusyon nga awhagon ang DEPED sa tulo ka division sa Bukidnon nga suportaran ang programa sa DOH ilabina ang pagpabakuna sa mga bata batok sa sakit nga tipdas.
Samtang gipahayag usab ni Amit nga mamahimo usab kining buhaton sa PHO basta lang adunay consent o waiver ang mga estudyante gikan sa ilang mga ginikanan.
