Davao City – Giklaro sa Department of Education (DepEd)-XI nga angay nga muagi og proseso ang pagpangolekta sa usa ka magtutudlo og kwarta ngadto sa mga estudyante labi na sa mga pampublikong eskwelahan.
Sa interbyu sa DXDC RMN Davao kang Jenielito “Dodong” Atillo, spokesperson sa DepEd-XI, gibutyag niini nga angay magbaton og panagsabot sa Parent Teacher Association (PTA) labi na sa hisgutanan sa panalapi nga gitagana sa pagpalambo sa eskwelahan ug kaayuhan sa mga kabataan.
“We need to have some sort of shared governance dinha sa sulod sa tulunghaan gumikan kay ang eskwelahan usa man siya ka organisasyon ug institusyon nga nanginahanglan og tabang sa atoang mga ginikanan pero kining tanan kinahanglang muagi sa proseso sa pagpahibalo ug ikaduha proseso sa pag-aprobar sa majority sa mga miyembro,” saysay ni Atillo.
Gipasabot ni Atillo nga dili angay mamahimong babag sa pagtungha sa usa ka bata ang kontribusyon labi na nga libre ang edukasyon sa pampublikong eskwelahan ubos sa republika sa Pilipinas.
“In general sense, kining tanan nagpabilin nga boluntaryo, kining tanan nagpabilin nga walay pinugsanay ug kining tanan nagpabilin nga walay impact sa pagtungha sa atong mga kabataan,” tataw ni Atillo.
Segun sa DepEd-XI spokesperson nga kung adunay may mga kontribusyon nga wala mi-agi sa proseso, adunay katungod ang estudyante o ginikanan nga i-reklamo kini sa labaw sa eskwelahan o sa principal aron kini ma-aksyunan.
RadyoMaN Kirby Manzon
