Sarangani Province–Laing myembro sa gabinete ni Pangulong Rodrigo Duterte ang nibisita sa probinsya sa Sarangani pinaaagi ni DepEd Undersecretary Annalyn Sevilla. Anaa kini aron personal nga tambungan ang usa (1) ka semana nga SRAA Meet kon SOCCSKSARGEN Regional Athletic Association Meet 2019 nga matapos karon ng adlawa didto sa lungsod sa Kiamba pangunahan ang closing ceremony nila Governor Steve Chiongbian Solon og DepEd Regional Director Allan Farnazo.
Si Usec Sevilla ang undersecretary sa finance, budget og performance monitoring nationwide og sya pud ang key spokesperson sa DepEd National, rason nga gawas sa iyang paghatag og inspirasyon sa mga atleta, iya pung gi-anunsyo ang mga dagkong updates sa DepEd.
Iyang gipabalo nga karong adlawa na lang, Pebrero 22, mahuman ang usa ka bulan nga Early Registration campaign sa DepEd kung diin ang tanang kabataan nga musulod isip kinder, Grade 1, Grade 7 og Grade 11 ang gikinahanglang magpa-rehistro una pa man mahitabo ang enrolment og opening sa klase sa bulan sa Hunyo. Matagaan unya og higayon ang DepEd nga makapangandam, og makumbinsi ang mga bata nga magpadayon sa pag-eskwela.
Samtang, gi-anunsyo usab ni DepEd Undersecretary Sevilla ang pagpakusog pa sa School-based Immunization Program. Suportahan matud pa sa mga ginikanan og magtutudlo ang padayon nga kampanya sa Department of Health, bisan na nila Governor Solon, nga pagbakuna sa mga kabataan tungod sa tipdas nga nahimo na karong national emergency sa tibuok Pilipinas.
