Davao City – Gipaklaro karon sa Department of Education (DepEd-XI) nga dili suspendido ang klase karong adlawa, March 9, 2020 taliwala sa pagkumpirma sa dugang kaso sa Coronavirus Disease kun COVID-19 dinhi sa Pilipinas.
Sa pakighinabi sa DXDC 621 RMN Davao kay Jenielito Atillo, DepEd-XI spokesperson, padayon silang naghulat karon sa abiso gikan sa DepEd-Central Office diin usab sila nagdepende sa desisyon nga mamugna karon sa Inter-Agency Task Force on Emerging Infectious Diseases (IATF-EID).
“(This is) Confirming that we are not suspending classes, walay suspension sa klase karong adlawa,” segun ni Atillo.
Samtang gisugilon sa tigpamaba nga kun matigayon ang gisugyot ni Mayor Sara Duterte-Carpio ubos sa iyang gi-release nga guidelines nga maapektuhan usab ang school calendar days gumikan sa ginasagubang nga public health emergency sa nasud, dili kini angay kabalak-an sanglit adunay preparadong alternatibong pamaagi ang buhatan sama na lamang sa Alternative Delivery Mode (ADM).
“Naa ‘tay ginatawag nga mga pamaagi, isa niana ang Alternative Delivery Mode… Dili angay kabalak-an, we can do something about it,” dugang ni Atillo.
Ubos sa pinasahing iskema nga ginagamit panahon sa mga emerhensiya ug kalamidad diin apektado ang pagtungha, gamiton sa DepEd ang gitawag nga ‘non-traditional education program utilizing non-formal and informal sources of knowledge and skills.’
Sa pagkakaron, adunay usa ka Person Under Investigation (PUI) nga gi-monitor dinhi sa Davao Region, sumala ni SPMC Chief of Clinics and Health Emergency Management Bureau (HEMB) coordinator Dr. Ricardo Audan.
RadyoMaN Renz Barbarona
