Davao City – Dalaon na ngadto sa St. Peter sa Tagum ang usa ka babaye nga napalgang wala nay kinabuhi niadtong adlaw’ng Huwebes sa Kalubihan, Bucana ning siyudad.
Ang maong patay’ng lawas nailhan nga si Leonida Limbago, 51 anyos, residente sa may Mankilam, Tagum ug usa ka magtutudlo sa may Mawab, Central ComVal.
Subay niini, nidumili una ang mga kabanay sa biktima sa paghatag og pamahayag kalabot sa gidangatan niini.
Sa statement nga gihatag nila sa kapolisan, wala na matud pa maka agwanta sa depresyon ang biktima.
Sa imbestigasyon sa kapolisan ulahing nakit-an ang biktima petsa 21 niining bulana human nga na-admit sa balay-tambalanan ang bana niini tungod sa sakit sa kidney.
Bandang alas-7:20 ang takna sa kagabhion sa maong adlawa milakaw ang biktima aron sa ilang panihapon apan wala na kini makabalik hangtod nga nakit-an na lamang sa baybayon nga wala nay kinabuhi.
Wala na gi-agi pa og autopsy examination ang patay’ng lawas niini segun ra usab sa gusto sa kabanay.
Daku usab nga pangutana sa kapolisan ug nganong miabot kini sa Davao River tungod layo ra man kini sa ospital.
Apan ang kaso buot ng pasirad-an sa mga kabanay.
RadyoMaN Paul Canono
