Girespeto sa Integrated Bar of the Philippines kon I-B-P sa Misamis Oriental-Cagayan de Oro Chapter ang bag-ohay pa lamang nga desisyon ni Judge Jeoffre Acebido sa Regional Trial Court Branch 41 nga nag-absuwelto sa kasong illegal drugs nga gipasaka sa Philippine Drug enforcement Agency kon P-DEA batok ni Johaira Macaubat alyas Marimar ang nabantog nga drug queen sa Southern Philippines.
Kini nagbasi sa usa ka pahinang official public statement sa local Chapter sa I-B-P nga gipirmahan nila ni I-B-P President Eddie Cuaresma, Katrina Mordeno-Secretary, Kenneth Tamala-Treasurer, Janeth Nuñez -Auditor ug Dexter Precioso – Public Relation Officer.
Mipirma usab sa maong public statement sila I-B-P Board of Director Teresa Blanco, Rex Jose Raagas, Gregorio Miguel Pallugna, Anna Caroz Georgina Huerbana ug Rey Raagas nga I-B-P Immediate Past President.
Matud sa I-B-P nga ang desisyon ni Judge Acebido nga nag-absuwelto sa kaso batok ni Marimar, nakabase sa gimando sa batakang balaod ug mga patakaran sa husgado.
Mahinumduman nga gi-dismiss ni Judge Acebido ang kasong illegal drug batok ni Marimar human nakit-an sa korte nga walay nada ang mga ebedensiya nga gipresentar sa P-DEA didto sa husgado.
Base sa decision ni Judge Acebido, iyang gitawag nga “Fruit of Poisonous Tree” ang mga ebedensiya sa P-DEA nga ilang nakuha sa balay ni Marimar sa Barangay Kauswagan ning syudad.
Matud sa I-B-P nga ang batakang balaod naghatag kasigurohan sa pagpahamtang og silot niadtong mga tawo nga makit-ang sad-an ug naghatag usab kinig kasigurohan alang sa hingpit nga kagawasan niadtong mga inosente.
