Ginahulat na lang sa subong sang contructor nga E.M. Cuerpo, Inc. ang pinal nga desisyon sang Department of Health national kon sa diin gid ibutang ang P200 million nga 4- storey hospital building. Ini matapos nga nag-apela si South Cotabato Governor Reynaldo Tamayo Jr. sa DOH nga ibalhin ini sa bahin sang Protech Center.
Sa ginpatigayon nga question hour sang Sangguniang Panlalawigan kahapon nga adlaw sa ila nga regular session ginpahayag ni South Cotabato Board Member Ellen Grace Subere Albios, Chairperson sang Committee on Health sang SP nga sa ginpadala nga sulat sa ila ni DOH 12 Regional Director Dr. Aristides Concepcion indi pwede mabalhin sang site ang itukod nga 4- storey hospital building tungod nabid kag naaward na. . Nahibaluan nga una na nga gin-aprobahan sang mga katapo sang Sangguniang Panlalawigan ang resolution nga himuon nga extension area sang South Cotabato Provincial Hospital ang Protech Center para sa masunod pa nga expansion nga himuon sang balay bulungan kag indi para sa P200 million 4-storey hospital building.
Ginpatigayon ang question hour sang SP agud nga hibaluon ang status sang construction sang P200 million 4-storey hospital building nga gintambongan nanday Dr. Marilou Libatique,sang DOH 12, contructor kag Provincial Legal Officer Atty. Marnito Cosep.
Madumduman nga ginpatigayon na ang groundbreaking sang Pebrero 2019 sang nagligad nga administrasyon nga ang ang site ang sa bahin sang South Cotabato Provincial Hospital compound ibutang ang 4-storey hospital building.
Nahibaluan nga ang bidding kag ang pag-award sa nagdaug nga bidder ang ginpatigayon sa national level amo nga wala sang ihibalo ang DPWH 12 sa nasambit nga proyekto
