Sa emergency meeting sa Barangay Naga kagahapong adlawa (April 11, 2022) uban ang personahe sa Provincial Health Office, Municipal Health Office, Municipal Administrator, Municipal Engineer, Municipal Disaster Risk Reduction and Management Office ug sa Philippine Red Cross, gideklara sa Barangay Disaster Risk Reduction and Management Council (DRRMC) ang State of Emergency aron nga magamit sa barangay ang ilang pondo.
Gisulti Ms. Sholyn Rose Asedilla, ang Disease Surveillance Officer (DSO) sa Provincial Department of Health Office nga posibleng hinungdan sa diarrhea outbreak mao ang pagka-kontamina sa tubig nga ginainom sa mga apektadong residente gumikan sa hugaw ug walay klarong kasilyas sa pipila ka mga panimalay nga duol sa maong water source.
Aron kini makumpirma, nagpahigayon og water sampling diin laumang mahibal-an ang resulta sulod sa 24 oras. Samtang, nagpahigayon usab og chemical sampling sa souce sa tubig pagsayud kung adunay chemical nga nasagol, diin ang resulta niini mahibal-an sulod sa duha ka semana.
Karong adlawa (Abril 12, 2022), magpahigayon Provincial Health Office og general terminal cleaning sa mga reservoir nga maoy ginakuhaan sa mga residente og tubig nga matud pa, wala pa gyud sukad nabutangan og chlorine ug na-decontaminate.
RadyoMaN Kirby Manzon
