Imbestigaran sang Department of Information and Communications Technology (DICT) ang ginapatihan paghack sa website sang Philippine Army.
Suno kay DICT Acting Secretary Eliseo Rio, nagapatigayon na sang imbestigasyon ang cybersecurity bureau sang iya talatapan kag nagakoordinar naman sa Army.
Sa pagpaathag naman sang Philippine Army, natabo ang data breach sadto pang Enero samtang nagapatigayon sila sang pagsaylo sang mga daan nga files.
Dugang pa ni Rio, nagabulig naman sa ila ang National Privacy Commission.
Apisar nga old files na ang na-hack, kinahanglan gihapon ini nga imbestigaran bangud mga personal data ang na-record didto.
Nahibalu-an nga nagpakilala bilang “Pinoy LulzSec” ang grupo nga yara sa likod sang data breach sang mas o menos 20 mil (20,000) nga tropa sang gobyerno. /rcsg
