President Roxas, Capiz – Nagpaandam si DILG Assistant Secretary Epimaco Densing sa mga grupo nga naga-advocate kag nagaduso sang federalism sa pungsod. Suno diri nga pagakasuhan sang iya talatapan ang sin-o man nga grupo nga nagapanukot sa pila ka mga miyembro sa pagpaubra sang ID kag iban pa nga balayran.
Ginklaro sini nga wala dapat sang may ginakuha nga kantidad sa mga miyembro sang grupo bangud ini ang boluntayro lamang nga pagduso sang pederalismo nga programa ni Presidente Rodrigo Duterte. Gindugang man sini nga padayon nga nagadamo ang mga grupo nga nagaduso sang pederalismo sa pungsod bangud makabulig ini agud mangin maumwad ang tagsa ka rehiyon sa Pilipinas.
Si DILG Assistant Secretary Epimaco Densing ang nangin dinapit nga bisita sang SWORD-AFPSM ukon Sincere Warriors of Rodrigo Duterte, Advocating Federalism & President Support Movement sa ila nga ginpatigayon nga programa sa banwa sang President Roxas, Capiz sang nagligad nga semana.
Nagtambong man sa nasambit nga program si Mayor Ike Patricio sang Pilar, Mayor Felipe Barredo sang Panay kag Mayor Recileste Escolin sang President Roxas, Capiz. Yara man ang presensya ang pila sa mga miyembro sang SWORD-AFPSM nagikan sa probinsya sang AKLAN kag ANTIQUE.
Ginpasalamatan man si Asec. Densing ang mga grupo nga naga-advocate sang pederalismo sa ila nangin suporta sa programa sang administrasyon ni Presidente Duterte. Si Asec. Epimaco Densing ang Assistant Secretary for Plans and Programs sang Department of Interior and Local Government[DILG].
