Sarangani Province–Si DILG Assistant Secretary Alexander Macario na mismo ang nagkumpirma nga gihimo nilang national model sa tibuok Pilipinas ang gipatuman nga programa ni Governor Steve Chiongbian Solon aron batukan ang terorismo.
Segun sa maong opisyal sa DILG atol sa launching bag-uhay lang sa Sarangani Province sa programang P.C.V.E. kon Preventing and Countering Violent Extremism kauban ang mga top brass og military generals sa Armed Forces of the Philippines Eastern Mindanao Command og Department of National Defense kuyog ang kanhing political adviser ni Pangulong Rodrigo Duterte nga si Secretary Francis Tolentino, nag-una matud pa ang Sarangani sa pag-implementa og mga produktibong inisyatibo may kabahin sa anti-violent extremism.
“Inclusive” matud pa ang gipatuman nga programa ni Governor Solon wala ra nakatutok sa usa ka grupo kundili sa halos tanang sektor aro masiguro nga ang kadaghanan ang mahiusa, mahisubay og malamdagan sa saktong direksyon og dili masalaag sa laing dalan og mga pagtulun-an.
Anaa ang lig-on nga peace and development program sa Sulong Sarangani ngadto sa Christian, Muslim og Lumad community, sa mga kabataan, kababaihan, non-government organization og business sector, religious group, barangay og municipal officials, mga community volunteers og bisan pa sa mga ordinaryong tao sa katilingban.
Si DILG Asec. Macario usa ka retiradong brigadier general sa kasundaluhan og nagkauyon matud pa sila sa approach nga gipatuman ni Governor Solon. Kini mao ang ginatawag nga “whole of nation approach.” Buot pasabot, tanan nga mga tao sa purok, sityo, barangay, munisipyo og probinsya ang sinsiro nga gatinabangay aron depensahan ang ilang palibot.
Natestingan na ang pagtinabangay sa mga katawhang Sarangan human nadakpan niaging bulan sa Marso 2018 ang giila nga usa ka convicted suicide bomber taga-nasud Indonesia nga niadto sa Palimbang, Sultan Kudarat. Tungod sa tabang sa komunidad, pag-abot pa lang niya sa Maitum, nahibal-an na ang iyang kalihukan.
Og bag-uhay lang pud, na-neutralize sa otoridad sa Maasim ang usa sa mga suspect nga maoy nagbomba niaging bulan sa Gensan, tungod gihapon sa tabang sa komunidad, ilang nakita nga adunay dayo sa ilang lugar.
Gihingusgan og gipklaro ni Governor Solon nga walay away sa relihiyon og sa rasa sa tao kundili sa pipila ra ka mga indibidwal nga buot usbon ang pagtulun-an sa simbahan alang sa ilang kaugalingong interes.
Giawhag na lamang niini ang tanang purok og barangay officials hilabi na sa mga coastal area sa Sarangani Province nga maoy manguna sa pagpabalo kung adunay mga foreigner nga muabot sa ilang dapit gamit ang kadagatan aron masuta kung aduna silay mga papeles, sa pagsuporta nila Senador Manny og Congressman Ruel Pacquiao, Vice Governor, mga board member og mga mayores.
