Davao City – Gipahinumdom ni Davao City Mayor Sara Duterte-Carpio nga padayong sundon ang mga ginapatumang health and safety protocols batok Coronavirus Disease 2019 (COVID-19) ilabi na panahon sa kalamidad.
Segun sa mayor kinahanglan nga aduna gihapoy face mask, frequent handwashing o alchohol ug social distancing ilabi na sa mga evacuation centers.
“Kung gipanawagan ‘ta nga mag preemptive evacuation, naa gihapon ang atoang mga gamit sa minimum public health standards, ang atoang face mask, alcohol, sabon ug kung posibleng madala nato atong meter stick to make sure nga ang ubang tao dinha sa evacuation center dili makaduol sa atoa,” sulti sa mayor.
Gipahinumdom usab ni Duterte-Carpio ang pagbaton og “Go Bag” o ang bag nga ginasudlan og mga importanteng gamit sulod sa 2-3 ka adlaw.
Nasayran nga pipila ka residente sa Davao ang gipabakwit human naapektohan sa mga pagbaha diin gipasidaan sa alkalde nga kanunay magmaigmat ang publiko batok sa bisan unsang kalamidad.
RadyoMaN Kirby Manzon
