BACOLOD CITY – Ginapanindugan ni Bacolod City Councilor, acting Vice Mayor Cesar Distrito nga wala sang sala sa procedure angut sa pag-approve sa P1.7 billion pesos nga loan sang ciudad sang Bacolod.
Ini ang reaksyon ni Distrito angut sa civil case nga ginfile batuk sa ila nanday anay Vice Mayor Thaddy Sayson kag anay Councilor Jocelle Batapa Sigue.
Suno kay Distrito nga wala sang kasaypanan sa procedure kag ginsunod nila ang tanan nga proseso kag requirements para ma-aprobahan ang amo nga loan.
Nahibaluan nga sanday Mayor Bing Leonardia, Vice Mayor El Cid Familiarian kag ang 16 ka iban pa nga mga incumbent officials lakip na si Distrito kag mga department heads ang ginpasakaan sang civil case for Certiorari, Prohibition and Annulment of Contract with Prayers for TRO.
Ginklaro ni Distrito nga ang kasuguan wala naga-require sang public hearing, apang sa gihapon nagpatawag sila sang isa ka public hearing apang wala sang bisan isa sa opposition nga nagtambong.
Nagapati ang konsehal nga ini nga tikang isa ka pamolitika kag tuyo nga ipaatrasar kag punggan ang mga flagship program sang Leonardia administration./dyHB BACOLOD
