Mikurtesiya si Department of National Defense Under Secretary Cesar B. Yano kauban sa iyang staff nga si Mr. Revi Revelo ngadto kang Bukidnon Provincial Governor Jose Ma. R. Zubiri, Jr. sa Provincial Governor’s Office.
Si USec. Yano ang gipadala sa Malakanyang gumikan sa hangyo ni Gov. Zubiri nga magpadala ug eksperto nga maoy motabang sa pagbatok sa nagkataas nga kaso sa COVID-19 sa atong probinsya.
Kahinumduman nga giaprobahan ni Presidente Rodrigo R. Duterte ang hangyo ni Governor. Zubiri nga magpadala ug eksperto gikan sa National Government pinaagi sa kumpirmasyon ni Department of National Defense Secretary Delfin N. Lorenzana human kini dritsong nanawag ngadto sa presidente sa gipahigayong pagbisita sa Coordinated Operations to Defeat Epidemic (CODE) Team sa Probinsya sa Bukidnon niadtong Martes sa pagpanguna ni Senador Juan Miguel F. Zubiri ug sa uban pang mga secretaries ug undersecretaries nga mga membro sa National Inter-Agency Task Force Against COVID-19 Pandemic.
Si Usec. Yano niabot kaniadtong Oktubre 21, 2020 sa kagabhion ug magpabilin sa probinsya hangtud Oktubre 28, 2020. Kini mopahigayon ug mga panagtigum, konsultasyon, monitoring ug ebalwasyon kauban ang mga membro sa Provincial Inter-Agency Task Force aron hisgutan ang ilang mga plano ug lakang kon unsaon pagsumpo sa nagkataas nga kaso sa COVID-19 sa atong probinsya.
