General Santos City—Pabilin pa sa kasamtangan sa morgue sa Dr. Jorge Royeca Hospital ang usa ka lalaki kansa kalit lang nga natumba ug nakabsan ug kinabuhi samtang nagbaktas sa may Ventelacion St., Barangay Lagao Gensan.
Subay sa tala sa Dr. Jorge Royeca Hospital, wala pa mailhan ang biktima kansa una nang gidala sa usa ka sikad driver human nga kalit lang natumba samtang nagbaktas sa maong lugar.
Nasayran nga usa ka Jose Delioste, sikad driver ang maoy nakakita sa biktima dihang kini natumba sa dalan, iya kining gitabangan ug gidala sa Dr. Jorge Royeca Hospital apan gideklara kining dead on arrival.
Gituohang giatake ang nasangpit sa iyang balatian nga hinungdan sa iyang kamatayon.
Samtang gituohan usab nga igo rang nipalit ug karne ang biktima sa usa ka meatshop nga nahimutang duol sa gitumbahan niini gumikan aduna pa kini bitbit nga karne dihang siya nakaplagan sa sikad driver.
