TACLOBAN CITY – Gindeklara an “white code alert” ha bug-os nga ahensya han Department Of Health (DOH) tungod han outbreak han tipdas ngan ha paghitaas han ihap han mga nabibiktima hini.
Sumala han tagapagyakan han DOH Regional Office 8 nga hi John Paul Roca, umabot na ha 27,000 an ira nabakunahan nga kabataan nga nag-eedad unom tubtob 59 kabulan.
Pero ha datos naman ha mga nabibiktima han tipdas, umabot na ha 662 an kaso ngan 20 na an namatay ha bug-os nga Region 8.
Lima (5) na an patay ha Tacloban City; upat (4) ha Palo, Leyte; ngan duha (2) naman ha Dagami, Leyte.
Tag-usa (1) naman an patay ha Alangalang, Pastrana, ngan San Miguel ha Leyte; Calbayog City, Catbalogan City, Gandara, San Jose De Buan, ngan Pinabacdao ha Samar; Ngan Borongan City ha Eastern Samar.
Sanglit an DOH, nagmugna na hin team nga magbabalay-balay ha pagbakuna.
Samtang, plano naman han departamento han panlawas nga buligan hira han Department Of Education (depEd) nga magmugna hin “no vaccination, no enrollment” ha mga eskwelahan.
