BAGO CITY – (3rd Update) Nakaagom sang 13 ka buno sang icepick si Dr. Felix Valenzuela matapos ini ang nasapwan patay sa sulod sang iya salakyan nga Hyundai i10 sa Kilometrahe 15, Brgy. Calumangan, Bago City kahapon sang aga.
Ini naman ang ginconfirm sang hepe sang Bago City Police nga Supt. Jopher Cabural sa interview sang dyHB.
Kahapon ginpatigayon ni C/Insp. West Edquila sang Scene of the Crime Operatives (SOCO) ang post mortem examination apang indi pa nila mapalayag sa media ang ila natukiban.
Ang salakyan Dr. Felix Valenzuela ang nakit-an sa kilid sang highway sa Barangay Calumangan sa diin nagatakilid ini sa passenger side nga wala sang kabuhi.
Indi malayo nga upod manlang ni Valenzuela sa salakyan kag kilala nya ang naghimo sang kremin.
Sa separado nga pagpangusisa sang dyHB may mga ginpasakaan sang kaso si Dr. Valenzuela sini nga tuig matapos nga iya natukiban nga ang iya mga kahoy sa iya duta sa Barangay Tabugon, Kabankalan City ang ginpangtapas.
Si Valenzuela ang anay konsehal man sang Bago City sa pamunuan sadto ni Mayor Manuel Torres kag nagserbe man City Health Officer.
Sa karon isa siya sa mga medical examiner sang Land Transportion Office (LTO) Robinson’s Place Bacolod branch.
