Ginklaro sang pamunuan sang Department of Labor and Employment ukon DOLE 12 sa ginpatigayon nga coordination meeting upod si Governor Reynaldo Tamayo, Jr. ang implementasyon sang mga programa sang ahensya sa probinsya sang South Cotabato.
Mismo si DOLE 12 Regional Director Raymundo Agravante upod si ARD kag Head of DOLE-South Cotabato Field Office Arlene Bisnon ang nagtambong sa nasambit nga coordination meeting.
Katuyuan sang nasambit nga pagsinapol ang agud nga klaruhon ang isyu sa implementasyon sang mga DOLE programs sa probinsya nga nauna na nga ginkwestyon ni Governor Tamayo, partikular na sa TUPAD program sang ahensya.
Samtang, nagpromisa naman ang ahensya sa pagpamuno ni RD Agravante nga magkooperar sa provincial government sa implementasyon sang programa sini agud nga malab-ot ang mga vulnerable kag displaced workers sa probinsya sa tunga sang pandemya.
Yara man sa nasambit nga coordination meeting sanday Supervising LEO Lalaine Arboleda sang DOLE-SCFO kag PESO Manager Flora Cavan sang PGO-South Cotabato.
Natapos suno pa ang pagsinapol nga may maayo nga resulta kag pag-umpisa liwat sang partnership sa tunga sang DOLE kag Provinicial Government sang South Cotabato.
