General Santos City–Duna nay nakaandam nga programa ang DOLE-Gensan alang sa mga empleyado sa Gaisano Mall of Gensan nga apektado sa pagkasunog niini niadtong milabay nga simana kung asa gibana-banaang anaa sa 2,000 ka mga trabahante ang nawad-an ug trabaho.
Sumala ni Fatima Bataga ang labaw sa DOLE-Gensan nga sa karon ginapaabot nalang nga mahuman ang ginahimong profiling sa CSWDO sa mga apektado nga trabahante aron nga ilahang ma-account ang tanan nga mga apektado ug mapailawom sa ilang programa.
Duna matud pay duha ka matang sa programa ang dole sa susamang mga kaso, ang una mao ang Tupad Emergency Employment kung asa gilayon nila nga hatagan ug trabaho sulod sa napulo ngadto sa 30 ka adlaw diin magdawatan ug minimum nga suhulan ang mga nasangpit. Gawas niini lakip nga ihatag ang ilahang insurance sa sulod sa usa ka tuig.
Ikaduiha mao ang livelihood program nga ilahang gina tanyag kung asa muagi pa ug pipila ka mga simenar ug pagtuon ang mga binipesyaryo ayha nila masugdan ang nasangpit nga programa.
Samtang gipaklaro man usab ni Bataga nga ang mga naka-avail na ug cash assistance gikan sa DSWD ang dili na nila mamahimong maapil sa ilahang programa.
Gipaniguro usab niini nga ila gyong siguruhon nga tanang apektado nga mga empleyado sa pagkasunog sa Gmall ang maka-avail ug programa sa gobyerno ug dili ang pipila lang. (Dave Silagan)
(Photo Credit to; LGU-Gensan FB Page)
