Ginatun-an sa karon sang Department of Labor and Employment (DOLE) nga kuhaon ang bahin sang income sang PLDT para mabayaran ang benepisyo sang linibo ka mga empleyado sini nga wala ginregular sa trabaho.
Sa isa ka interview, ginpahayag ni DOLE Sec. Silvestre Bello III nga wala sa gihapon matuman sang PLDT ang mandu sang ahensya nga himuon regular ang yara sa 7,000 ka mga empleyado sini nga ginkuha ang serbisyo pinaagi sa service providers ukon manning agencies.
Dugang pa ni Bello, nag-apelar sa Court of Appeals ang PLDT pero napaslawan ini nga makakuha sang TRO rasun nga kinahanglan nila sundon ang mandu sang DOLE.
Suno kay Bello, kun magpakatig-a pa gid ang PLDT, ginatun-an sang DOLE nga i-garnish ang bahin sang ila income para bayaran ang benepisyo nga dapat mabatunan sang mga empleyado nga dapat regular naman.
Ginapaimbestigaran man sang DOLE sa Securities and Exchange Commission kag National Bureau of Investigation ang mga reklamo nga nakalab-ot sa ahensya nga ang mga service provider kag manning agency ang nagahatag sang tinawo sa PLDT, ang lunsay mga executives man sang nasambit nga telecommunication company ang tag-iya. /rcsg
