Davao City – Dili pa makumpirma sa 3RD Infantry Battalion Phil Army nga sakop sa New People’s Army kun NPA ang nangdabdab sa ekipo sa DOLE sa Tugbok ning syudad.
Gibutyag ni 3RD IB Commander Lieutenant Colonel Raymund Dante Lachica atol sa AFP PNP presscon nga bisan paman adunay mga hungingong nga NPA matud pa ang nanunog, dili pa nila kini makumpirma tungod wala pa nahuman ang imbestigasyon ug sagad matud pa nga og adunay mga pagpangdabdab, ginaangkon kini sa pikas pundok.
Kahinumduman nga gidabdaban ang usa ka truck alas 7:00 pasado niadtong milabayng gabii nahitabo sa Sitio Banarao, Brgy. Talandang, Tugbok District, Davao City.
Base sa report, nasayran nga ang maong truck adunay karga nga kapin 200 ka mga box sa saging ug gipanaog ang mga sakay niini ug gisunog ang nasangpit nga sakyanan sa wala pa gihapong mailhing grupo.
Padayong gihapon ang pagmonitor sa 3rd IB sa nasangpit nga area kalabotan sa mga hinimuan sa pikas pundok diin sakop matud pa sa maong grupo ang 3rd congressional district sa syudad sa Davao.
RadyoMaN Renz Barbarona
