Davao City – Nabalaka ang Parents Mobilization Action Group (PMAG) sa sunod-sunod nga bayolente ug maduguon nga pang-hitabo sulod sa pamilya niining ulahing mga adlaw dinhi sa atong siyudad sa Dabaw.
Naalarma si PMAG President Febe Matthew sa mangilngig nga pagsunog patay sa amahan sa iyang anak nga batang babaye sa Panacan ug pagbunal patay sa bana sa iyang asawa sa Tibungco ning siyudad.
Nag-unang rason sa krimen mao nga dili madawat sa amahan nga siya gibulagan sa inahan sa biktima ug ang pakigrelasyon sa laing lalake maoy nagtukmod sa banang suspek aron bunalan sa tubo sa ulo ang iyang misis resulta sa kamatayon.
Ang natigayong krimen sulod sa pamilya imahe sa ‘crime of passion’ nunot sa domestic violence diin ma-tan-awan ang brutal nga klase sa pagpatay sa miyembro sa pamilya diin sukwahi kini sa naandang rason.
Ang emosyon sa kalagot lisod pugngan sa magtiayon nga kuwang og pagsinabtanay diin mag-trigger kini sa hunahuna aron dapatan ug patyon ang partner o sakop man sa pamilya kun dili na makaya ang pagbati.
Busa segun ni Matthew, wala gayuy como kung maglingkod lang unta ang mag-asawa aron sulbaron ang problema sa malinawon nga pamaagi nga dili na musangpot sa brutal krimen sama sa magtiayon sa Tibungco.
Alang sa Pangulo sa PMAG, dako og ikatabang ang barangay intervention sa pag-address sa mga kaso sa domestic violence nga giintrahan sa miyembro sa pamilya.
Angay lang daw buhaton sa barangay council ang paglusad og awareness seminar program o dili ba suportahan ang bonding sa magtiayon aron mapundar ang maayo ug nunot nga relasyon tali sa duha inabagan sa pagpaluyo sa mga programa sa kasimbahanan.
RadyoMaN Joel Viray
