Nasunog kagahapon sa hapon ang panimalay sa usa ka Melinda Velez nga usa ka dos andana sa may Brgy. 32 ning syudad, nga gigama lamang sa mga light materials.
Nasayran nga ang maong panimalay gipuy-an sa magtiayong Gilbert Incabo, kinsa mihangyo nga mosilong lamang sulod sa lima ka adlaw hinungdang wala na kini gipaabang, apan hangtod karon ang wala na mibiya sa maong balay.
Matud ni Maam Melanie Salingay, ang anak sa tag-iya nga kaniadto hapit na usab kini masunog apan wala kini mahinayon, human nga nabantayan sa nagpuyo sa maong balay, apan karon nadayonan na gayod.
Nagpasalamat usab kining wala na makaperwisyo sa ubang silingan ang maong sunog, apan natingala kini kon nganong nasunog ang balay sa iyang inahan nga aduna man untay nagpuyo sa silong nga bahin niini.
Samtang, nadawat ang report sa sunog kagahapon mga alas-3:48 ug na-under control mga alas-3:55 samtang napalong ang kalayo mga alas kwatro sa hapon.
Kini ang gibutyag ni SFO1 Dennis Dales, ang inbistigador sa Bureau of Fire Protection kon B-F-P 10 ning dakbayan kinsa miingon nga wala na usab mitapot pa sa ubang balay ang maong sunog.
Gibana- bana ni SFO1 Dales nga mobalor lamang sa kinse mil pesos ang damyos sa sunog, ilabina nga gigama lamang sa light materials ang maong balay.
Dugang pa niini nga duha ka anggulo ang ilang gitan-aw sa insidente ug kini mao ang paggamit og lighter sa mga bata nga nagdula-duha sa taas nga bahin sa maong balay, nga bakante ug ang illegal nga flying koneksyon sa linya sa kuyenti.
Tungod niini, nanawagan ang maong opisyal nga bantayan ang mga bata nga magdula og lighter ug likayan ang ilegal nga pag-flying sa kuryenti.
By; Radyoman Aiza Enloran and Ellah Baculio
