SAGAY CITY, NEGROS OCCIDENTAL – Padayon karon nga ginabulong sa ospital ang lima sa 18 ka mga pasahero nga nasamaran sang naaksidente ang isa ka double-tire nga bus pasado la una kahapon sang hapon sa Purok Linagasan, Brgy. Bato, Sagay City.
Ang lima ka mga samaron nga pasahero ginkilala nga sanday Salome Torrena, 32, Salvador Benedicto, Joefrey Torrena, 37, lunsay pumuluyo sang Brgy. Bago, Don Salvador Benedicto, Amita Sohot, 45, sang Brgy. Lalong, Calatrava, Marlin Caballero, 47, kag Rafael Caballero, 50, tanan pumuluyo sang Brgy Bug-ang, Vergara, Toboso.
Suno sa imbestigasyon sang Sagay PNP, na-utod ang ihe ukon mulye sang Cebro Lines nga bus gani nadulaan sang control ang driver kag napilitan ini nga ibunggo na lang sa puno sang kahoy.
Nakilala naman ang driver sang depasahero nga bus nga amo si Rodrigo Bernabat, 40 anyos ang edad.
Ang mga nasamaran nga pasahero gindala sa Corazon Locsin Montelibano Memorial Regional Hospital./dyHB BACOLOD
