Sa interbyu sa DXDC RMN Davao kang Dean Ortiz, tigpamaba sa DPWH-XI, gisulti niini nga delikado alang sa mga residente ang pagpuyo ilawom sa tulay ug bisan ang mga nanimuyo daplin sa kasapaan sa dakbayan.
“In the first place, dili dapat papuy-an ang ilalom sa tulay. Wala gyoy dapat mag-occupy sa ilalom sa tulay kay number one, delikado sa ilang kinabuhi. Ikaduha, kung adunay mahitabo nga mga sunog or man-made nga disaster, susceptible gyud ang structure,” matud ni Ortiz.
Sa kasamtangan, temporaryong gisirad-an ang Bolton Bridge 1 (Southbound) nga labing naapektuhan sa sunog. Samtang, sirado usab ang Bolton Bridge 2 (Northbound) apan ginasuta pa kung pwede pa nga maagian sa motorista o nanginahanglan nga i-repair.
Giabisohan sa DPWH ang mga motorista nga mugamit una og alternatibong ruta o dalan samtang gisirado pa ang maong tulay.
RadyoMaN Kirby Manzon
