General Santos City— Gihingusgan ni Glennville Gonzales, tagduamala sa Dr. Jorde P. Royeca hospital nga walay kamatuuran ang nagkatag sa social media nga sumala pa gipagawas sa maong balay tambalanan ang usa ka pasyenteng nailang si Arlene Colanses nga nakasinati ug grabeng sakit sa tiyan.
Sumala niya nga gihatagan ug igong pagtagad ang nahisgutan sulod sa Dr. Jorge human matud pa kina wala gidawat sa usa ka pribadong hospital sa may Brgy. Calumpang.
Pagpaklaro niya nga makapila na ka higayon nga nagbalaik-balik sa Dr. Jorge ang nasangpit nga pasyente ug wala nila kini gisingil ug bisan piso.
Dugang pa niya nga bag-uhay lang na-discharge ang nahisgutan sa susamang balay tambalanan hinungdan nga kini nakagawas ug posible matud pa nga nasayop lang ug sabot ang tawong nag-post sa social media ug gituuhang wala gitagad ang nasangpit nga pasyente ug gipagawas.
Pag-angkon niya nga aduna gyuy ubang tawo nga grabe nga makapandaut sa hospital sa gobyerno, apan iyahang gipaklaro nga ilahang ginahimo ang tanan aron lang mahatagan ug maayong serbisyo ang katawhan sa dakbayan. (photo credit: Glennville Gonzales)
