Malampusong nasikop sa mga kapulisan ang usa ka drayber sa pagpayuhot sa illegal nga droga atol sa drug buy-bust operation nga gipahigayon kagahapon didto sa Purok-5, Brgy. San Jose, Malaybalay City, Bukidnon.
Giila ang suspetsado nga si Joseph Ubagan, 41 anyos, drayber ug residente sa Brgy. Mapayag, Malaybalay City.
Nakompiska gikan kang Ubagan ang unom ka heat sealed transparent plastic sachet nga mikontinar og ginadiling drogang shabu nga mitimbang og 3 gramos ug gibana-banang mukantidad og kapin P20,000.00. Nakompiska usab ang usa ka P500 Bill ug usa ka unit sa Rusi nga motorsiklo.
Gidala na sa Malaybalay City Police Station ang suspetsado lakip ang mga nakompiskang ebidensiya alang sa tokmang disposasyon samtang ginaandam ang kaso batok kaniya.
