SAGAY CITY, NEGROS OCCIDENTAL – Wala na nasalbar kag napatay ang isa ka driver matapos nga ini ang nagpaligo kag nalumos kadungan sa pagsaulog sang fiesta ni San Juan de Bautista sadtong Sabado sa isa ka beach resort sa Brgy. Bulanon, Sagay City.
Nakilala ang biktima nga si Ramil Carbajal, legal ang edad kag pumuluyo sang banwa sang Pontevedra.
Base sa imbestigasyon, pasado las 9 sang nagligad nga Sabado sang aga, nagkadto sa isa ka beach resort ang biktima agud magpaligo apang ini siya ang disgrasya nga nalumos nga nagresulta naman sang iya kamatayon.
Upod ang iya mga barakada, hubog ang biktima samtang nga nagapaligo rasun naman nga wala na ini nakahibalo sang iya ginahimo.
Sa pihak nga bahin, sa Kabankalan City naman patay ang isa ka 4-year old nga bata nga lalaki sang ini ang nalumos sa bubon sa Brgy. Tapi sa amo nga ciudad.
Ginpahayag nga natulugan ang iloy sang pasado la una sadtong Biernes sang hapon kag sa iya pagbugtaw wala na ang iya bata.
Sang ila ginpangita, nasapwan na gid lamang ang biktima nga nagalutaw na sa bubon nga malapit sa ila balay kag wala na sang kabuhi.
