Nasubo karon ang pamilya ug mga kaubanan sa trabaho ni Bukidnon Provincial Election Supervisor Atty. Stalin Baguio.
Kini human ma-aksidente si Atty. Baguio nga nahimong hinungdan sa iyang hinanaling pagkamatay sa Purok 2, Patag, Barangay Bagontaas, Valencia City, Bukidnon.
Sa police blotter sa Valencia City Police Station nasayran nga dead on arrival na nga gidala sa balay tambalanan si Atty. Baguio, 48 anyos, minyo ug nagpuyo sa Kauswagan, Cagayan de Oro City.
Nasayran nga nagdagan ang gimanehong Toyota Fortuner ni Atty. Baguio sa national highway gikan sa siyudad sa Malaybalay ug paingon sa Valencia City sa kalit lang nalagpot ang dakong bato nga gikan sa ligid sa iyang nakatagbo nga dump truck alas 10:10 sa buntag kagahapong adlawa.
Ang dump truck gipanag-iyahan sa Oxford Mines Inc. nga gimaneho sa usa ka Ruel Dumandan, 45 anyos minyo ug lumulupyo sa Purok 6, Casisang ning siyudad sa Malaybalay ang nagdagan sa opposite nga direction.
Nasayran nga milagpot ang bato nga gikan sa wala nga ligid sa mao nga dump truck paingon sa windshield sa sakyanan ug mi-igo sa dagway ni Atty. Baguio.
Samtang kagabie nadakpan sa kapulisan sa Valencia City Police Station sa gihimong hot pursuit operation ang driver sa truck ug kasamtangan detinado sa PNP Valencia.
Sa interview sa RMN DXMB Malaybalay ngadto sa driver sa dump truck nga si Ruel Dumandan gibutyag ninii nga wala siya kabalo sa mao nga panghitabo.
Matud niya nga base sa kuha sa CCTV footage, wala siyay katagbo nga sakyanan.
Gipamugos usab niya nga iyang gisusi daan ang ligid sa iyang gimaneho.
Dili usab daw niya maka-angkon nga iyang sayop ang mao nga panghitabo apan tungod niini nangayo usab siya ug pasaylo kung gikan sa iyang gimanehong sakyanan ang mao nga bato.
