Patay ang driver sang motorsiklo sa nagluntad nga disgrasya sa dalanon sa National Road, Purok 1, Brgy. Centrala, Surallah, South Cotabato,pasado alas 8:00 kagab-i, Pebrero 21, 2021.
Ginkilala ang biktima kay Daniel Dellomes Ebuetada, 49 -anyos, mekaniko kag residente sang Purok Sison, Zone 5, Brgy. Libertad, Surallah, South Cotabato.
Imbolbado nga mga salakyan sa nasambit nga insidente ang isa ka unit sang Hyundai Galloper, ginamaneho ni Albert Garcia Macaraeg, 44 –anyos, Auto electrician kag residente sang Purok 1, Brgy. Centrala, Surallah, South Cotabato kag Honda XRM 125 nga ginamaneho sang biktima.
Sa inisyal nga imbestigasyon sang Surallah MPS ang duha ka mga salakyan ang nagasubay sa opposite direction, apang pag-abot sa natabuan sang insidente ang motorsiklo ang nagpadulong sa pihak nga dalan tungod sa madanlog nga dalan rason nga aksidente ini nga nabungguan sang Hyundai.
Resulta, ang driver sang motorsiklo ang nakaangkon sang seryoso nga pilas nga gilayon naman nga gindala sa ospital, apang gindeklarar nga dead on arrival sang attending physician.
Ang motorsiklo kag driver sang V1 ang gindala sa Surallah MPS para sa nagakaigo nga disposisyon.
