General Santos City— Bag-ong modus ang pagtago sa mga ginadiling droga sa mga container van. Kini ang gibutyag sa Philippine Drug Enforcement Agency kon PDEA 12.
Nasayran nga igo na lamang mirespondi ang mga personahe sa PDEA 12 human makadawat ug koordinasyon gikan sa NBI-SARDO nga adunay gituohang illegal nga droga sa aircon compartment sa usa ka container van nga walay sulod nga nahimutang sa usa ka Container Yard nga makaplagan sa may upper malok, Barangay Labangal ning dakbayan.
Sumala kang Kath Abad, tigpamaba sa PDEA 12 nga gilayon silang nagpahigayon ug k9 sniffing and paneling sa lugar kung asa adunay nakit-an nga usa ka bloke sa gituohang droga kansa gilayong gipa-ilalom sa laboratory test ug migawas nga kumpirmado kining cocaine. Gibana-banaang anaa sa 356 ka gramos nga adunay market value kantidad 1.89 million ka pesos.
Dugang pamahayag ni Abad nga dili dayon makit-an ang maong illegal nga droga gumikan nakatago sa compartment sa aircon. Subay sa intelligence monitoring, usa kini sa mga modus sa pagpasulod ug droga sa usa ka lugar. Subay sa inisyal nga imbestigasyon, gikan sa nasud Singapore ang maong container van ug ilaha pa karong ginasuta kung sa Singapore usab gikan ang maong cocaine o kung aduna pay laing port kining gihapitan ayha nakaabot sa Gensan.
Sa karon, ilaha pang ginasuta kung si kinsa o unsa nga kompanya ang nigamit sa maong container van aron masayran kung si kinsa ang posibleng pasakaan ug kaso gumikan hangtud sa karon, wala pay kasong napasang-at. Kalabot niini, gibutyag ni Abad nga nagpahigayon sila ug laing k9 sniffing ug paneling sa container yard asa nakaplagan ang iligal nga droga ingon man sa tanang container van nga walay sulod apan nag-negatibo. Posible matud pa nga dili Gensan ang destinasyon sa maong cociane ug dako ang posibilidad nga nabilin ang maong illegal nga droga dihang gi-diskarga ang sulod sa maong container van. Giklaro usab ni Abad nga human marekober ang maong cocaine, dili gyud angayan nga magkumpyansa sa mga Cargo o mga container van nga musulod rason nga ilaha pang mas pakusgan ang pagbantay sa mga kargamento nga muagi sa customs o sa Philippine Port Authority bisan na sa Gensan Airport. (LVR)
