Davao City – Gipaniguro karon sa Police Regional Office PRO-XI nga walay paglurang gani mas gipakusgan pa nila ang kampanya kontra iligal nga droga aron hingpit masumpo ang mangtas nga bisyong miguba sa kinabuhi ug kaugmaon sa nasud ug sa kasamtangang henerasyon.
Matud ni PRO-XI spokesperson Maj. Eudisan Gultiano, usaka social problem ang illegal drugs sa katarongan nga ma-kabus man o ma-aduhan, gradwado man or dili, pareho silang mahilambigit diha sa pagpayuhot ingon paggamit sa droga.
Usa sa nakitang rason ni Gultiano mao ang kalisud ug kawalay katagbawan sa bahandi maingon man ang pagka-adik mao nang bisan og daghan na ang nadakpan ug namatay sa mga operasyon, aduna gihapoy midula sa droga, segun ni Gultiano.
Ang kapulisan nakatala og 189 ka operasyon kun 48 ka buy-bust operations matag semana niresulta sa pagkumpiska sa drogang mukantidad og minilyon ka pesos ingon man pagkasikop sa 281 ka drug pushers gikan January 26 ning tuiga hangtud sa unang semana sa February.
Adunay maayong epekto ang gikasa nga giyera kontra droga base sa accomplishment report sa kampanya sa unang duha ka bulan karong tuiga itandi sa miaging mga tuig nagpasabot nga may pagkunhod na sa gidaghanon sa mga nalambigit sa droga sa rehiyon.
Suma ni Gultianio, dili sa tanang panahon mabantayan sa kapulisan ang katawhan nga nag-apil sa iligal nga kalihukan mao nga bisan og istrikto ang checkpoints, makalusot gihapon ang mga miyembro sa sindikato sa pagpakuyanap sa droga.
Dili lamang kapulisan ang angay saligan ug pasagdan sa katawhan diha sa pagtuldok sa suliran sa droga apan gikinahanglan usab ang hiniusang ayuda sa katawhan pinaagi sa paghatag og inpormasyon batok sa mga tawo nga magpayuhot ug maggamit sa droga, dugang pagpasabot ni Gultiano.
RadyoMan Joel Viray
